Если у вас возникли сложности с курсовой, контрольной, дипломной, рефератом, отчетом по практике, научно-исследовательской и любой другой работой - мы готовы помочь.
Предоплата всего
Подписываем
Болашақ жолындағы маңызды қадам
ЭКСПО-2017 КӨРМЕСІ – ЕЛДІКТІҢ ЕРЕН ЖЕҢІСІ
Болашақ жолындағы маңызды қадам
Халықаралық көрмелер бюросына мүше 161 мемлекеттің Париж қаласында өткен ХКБ 152-ші Бас Ассамблеясына қатысушы мемлекеттерінің ішінде 103 мемлекет Астананы қолдап, 44-і қарсы дауыс берді. Бұл – Астананың айқын жеңісі. Сөйтіп, 2017 жылы Астанада өтетін ЕХРО-2017 Орталық Азия өңіріндегі және ТМД аумағында өткізілетін алғашқы Бүкіләлемдік көрме болмақ.
Соңғы 14 жылдан бері Қазақстан Халықаралық көрмелер бюросының тұрақты мүшесі болумен қатар, осы дүниежүзілік беделді ұйым өткізетін іс-шараларға да белсенді қатысып келеді. 2008 жылы Испания Корольдігінің Сарагоса қаласында «Су және тұрақты даму» айдарымен EXPO-2008 Дүниежүзілік көрмесі өткен болатын. Оған қатысушы әлемнің 104 мемлекеті павильондарының арасында Қазақстан Республикасының павильоны «С» дәрежесі бойынша қола жүлдені жеңіп алған еді. «EXPO-2008, Саргоса» Дүниежүзілік көрмесінің ашылу салтанатына қатысқан Елбасы Нұрсұлтан Назарбаев сол жолы алғаш рет Қазақстанда Дүниежүзілік көрме өткізу идеясын айтқан болатын.
Ал 2011 жылдың 10 маусымында Сыртқы істер министрлігінің жауапты хатшысы Рәпіл Жошыбаев Париж қаласындағы Халықаралық көрмелер бюросының (ХКБ) штаб-пәтерінде болып, оның бас хатшысы Гонсалес Лоссерталеспен кездесті. Осы кездесу барысында Р.Жошыбаев оған Қазақстан Республикасының EXPO-2017-ні Астана қаласында өткізу жөніндегі ресми өтінішін тапсырды. Сөйтіп, Қазақстан өткен жылдың 10 маусымынан бастап Халықаралық көрмені өткізу құрметін жеңіп алу жолындағы дүниежүзілік бәйге бәсекесіне түсті. ХКБ талабы бойынша, көрме жұмысы жалғасатын үш ай ішінде Астана қаласы оған қатысушы әлемнің 100 мемлекетінен 4 миллионнан астам адамды қабылдауға дайын болуы керек.
Еске сала кетсек, халықаралық көрме құқы үшін Астана Бельгияның Льеж қаласымен бәсекеге түскен болатын. Астана халықаралық көрме үшін «Болашақтың энергиясы» тақырыбын ұсынса, бәсекеге түскен Льеж қаласы «Әлем мен адамзатты біріктірейік» атты тақырыбын ортаға тастаған еді. Сөйтіп, бұған дейін де жаһандық деңгейдегі ЕҚЫҰ саммиті, Азиада ойындары секілді жауапты шараларды өткізу арқылы әлем жұртшылығының назарын өзіне аударып келген Астана алдағы уақытта тағы бір қырынан танылатын мүмкіндік алды.
Қазақстан Халықаралық көрмелер бюросының мүшелігіне 1997 жылы қабылданған болатын. Бүкіләлемдік көрмеде алғаш рет Қазақстанның көк туы 1998 жылы Лиссабонда өткен EXPO-ның Халықаралық мамандандырылған көрмесінде желбіреген болатын. Белсенді мүше ретінде Қазақстан EXPO-ға 2005 жылдан бері қатысып келеді. Дәл осы жылы көрме Жапонияның Аичи қаласында өткен болатын. Испанияның Сарагоса қаласында өткен EXPO-2008 көрмесінде Қазақстан павильоны С санаты бойынша ІІІ орынға ие болғанын да айттық. Ал Қытайдың Шанхай қаласындағы EXPO-2010 көрмесінде Қазақстан павильонын жарты миллионнан астам адам аралап көрген еді. Ағымдағы жылы Қазақстан Оңтүстік Кореяның Ёсу қаласында өткен EXPO-2012 көрмесіне де белсенді қатысты.
Қазақстан EXPO-2017 көрмесі тақырыбын «Болашақтың энергиясы» деп таңдаған болатын. Бұл тақырыптың адамзат үшін өзектілігіне еш шүбә болмасы да анық. Өйткені, соңғы уақытта жаһанның күн тәртібінде бекіген мәселенің бастысы энергетикалық қауіпсіздік болғаны даусыз шындық. Тоқтала кететін бір жайт, Экономикалық интеграция министрі Жанар Айтжанова осы тақырыпты таңдауға қатысты: «Бүгінде әлемге дамудың жаңа – экологиялық қауіпсіз жолдары керек. Сонымен қатар, қазіргі таңда Қазақстан «жасыл экономикаға» бағдарланған ел қатарында. Біздің пікірімізше, болашақ энергиясы туралы пікірталас біздің заманымыздың анағұрлым әмбебап пікір-таластарының бірі болып табылады және сол себептен EXPO-2017 көрмесі үшін миллиондаған адамды толғандыратын тақырып таңдап алынды», деп мәлімдеген болатын. Ал EXPO-2017 Ұйымдастыру комитетінің төрағасы – вице-премьер Қайрат Келімбетов Қазақстан EXPO-2017 аясында «Болашақтың энергиясы» тақырыбын таңдап ала отырып, еліміздің дамуын «жасыл экономикаға» негіздейтін барлық дерлік шаралар қабылданғанын алға тартады. Сонымен қоса, Қазақстан Президенті Н.Назарбаевтың әлемдік қоғамдастық алдына «Жасыл көпір» атты жаһандық бастамасы ұсынылып, ол «Рио+20» конференциясында бекітілгенін атап көрсетті. «Біз үшін EXPO-2017 Астананың ғана емес, тұтастай Қазақстанның экономикалық өміріндегі жаңа кезең болмақ. Ал «Болашақтың энергиясы» тақырыбында диалогтық алаң құру – бұл барша жаһан үшін орнықты дамуды қалыптастыруға, сондай-ақ планетаны сақтауға бағытталған маңызды қадам болмақ», дейді Ұйымдастыру комитетінің төрағасы.
Астанада ЕХРО көрмесі шеңберінде Қазақстанның ғылыми және технологиялық жетістіктер көрме-кешені жұмыс істейтін болады. Жоба бойынша көрме қалашығында Өмір, Әлем, Ғарыш және Сана атты төрт павильон жұмыс істемек. Басты ерекшелік – бұл көрме-кешен балама энергиялық қуат көздерімен жұмыс істейді. Сөйтіп, Қазақстанның ЕХРО-2017 көрмесін өткізуге арнаған «Болашақтың энергиясы» тақырыбы іс жүзінде дәйектелмек.
Сөйтіп, Астанаға бұйырған ЕХРО Халықаралық көрмесі 2017 жылдың 10 маусымынан 10 қыркүйекке дейін созылады. Оған жүздеген елден және ондаған әлемдік ұйымдардан өкілдер қатысса, көрмені тамашалауға келетін адамдар саны кем дегенде 5 млн. адам болмақ. Ал Астанада белгілеген ЭКСПО-ның аумағына 113 гектар жер бөлініп, 97 павильон тұрғызылады.