Если у вас возникли сложности с курсовой, контрольной, дипломной, рефератом, отчетом по практике, научно-исследовательской и любой другой работой - мы готовы помочь.
Предоплата всего
Подписываем
Неделя третия по Пасхе,
святых жен мvроносиц и Иосифа Праведнаго.
На велицей вечерни.
Христос воскресе: как обычно. Таже псалом преднаинательный: Благослови душе моя Господа: И кафисма 1 псалтира.
На Господи воззвах: поставим стихов 10 и поем:
Стихиры воскресны 3, глас 2:
Стих: Изведи из темницы душу мою, исповедатися Имени Твоему.
Прежде век от Отца рождшемуся Божию Слову, воплощшемуся от Девы Марии, приидите поклонимся: крест бо претерпев, погребению предадеся, яко сам восхоте, и воскрес из мертвых, спасе мя заблуждающаго человека.
Стих: Мене ждут праведницы, дондеже воздаси мне.
Христос Спас наш, еже на ны рукописание пригвоздив на кресте заглади, и смертную державу упраздни: покланяемся Его тридневному воскресению.
Стих: Из глубины возвах к Тебе Господи, Господи, услыши глас мой.
Со Архангелы воспоим Христово Воскресение, Той бо есть Избавитель и Спас душ наших: и в славе страшной, и крепцей силе, паки грядет судити мiру, егоже созда.
И восточны 4, глас тойже.
Стих: Да будут уши Твои внемлюще гласу моления моего.
Тебе распеншагося и погребеннаго, ангел проповеда Владыку, и глаголаше женам: приидите, видите, идеже лежаше Господь, воскресе бо, якоже рече, яко всесилен. Темже Тебе покланяемся, Единому Безсмертному Жизнодавче Христе, помилуй нас.
Стих: Аще беззакония назриши Господи, Господи, кто постоит? яко у Тебе очищение есть.
Крестом Твоим упразднил еси, юже от древа клятву: погребением Твоим умертвил еси смерти державу: востанием же Твоим просветил еси род человеческий, сего ради вопием Ти: Благодетелю Христе Боже наш, слава Тебе.
Стих: Имене ради Твоего потерпех Тя Господи, потерпе душа моя в слово Твое, упова душа моя на Господа.
Отверзошася Тебе, Господи, страхом врата смертная, вратницы же адовы, видевше Тя, убояшася: врата бо медная сокрушил еси, и вереи железныя стерл еси, и извел еси нас от тмы и сени смертныя, и узы наша растерзал еси.
Стих: От стражи утренния до нощи, от стражи утренния, да уповает Израиль на Господа.
Спасительную песнь поюще от уст возслем: приидите вси, в дому Господнем припадем, глаголюще: на древе распныйся, и из мертвых воскресый, и Сый в недрех Отчих, очисти грехи наша.
Таже стихиры мvроносицам самогласны 3, глас 2. Анатолиа.
Стих: Яко у Господа милость, и многое у Него избавление, и Той избавит Израиля от всех беззаконий его.
Мvроносицы жены, утру глубоку, ароматы вземшя, Господня гроба достигоша, яже не надеяхуся обретшя помышляху благоговеюще каменному отвалению, и друга ко друзей глаголаху: где суть печати гроба? Где есть Пилатова кустодиа и опасное утверждение? Бысть же Возвеститель не разумевающым женам, блистаяйся Ангел, и глаголяй к ним: что с рыданием ищете Живаго и оживотворившаго род человеческий? Воста Христос Бог наш из мертвых яко Всесилен, подаяй всем нам нетление и жизнь, просвещение и велию милость.
Стих: Хвалите Господа вси языцы, похвалите Его вси людие.
Почто мvра со слезами, о ученицы растворяете? Камень отвалися, гроб истощися: видите тлю, Животом попранную, печати свидетельствующя явственно, спящыя люте стражники непокоривых, смертное спасеся плотию Божиею, ад рыдает. Текшя радостию рцыте апостолом: умертвивый смерть Христос, перворожден из мертвых, вас предваряет в Галилеи.
Стих: Яко утвердися милость Его на нас, и истина Господня пребывает во век.
Мvроносицы рано бывшя, и гроб Твой со тщанием достигшя, искаху Тебе, Христе, во еже помазати Пречистое Тело Твое. И ангеловыми глаголы огласившеся, радостотворныя образы апостолом проповедаху, яко воскресе Начальник спасения нашего, пленивый смерть, мiрови же даруяй живот вечный и велию милость.
Слава: глас 6. Космы монаха:
Мvроносицы жены, гроба Твоего достигшя, и печати гробныя видевшя, не обретшя же Пречистаго Тела Твоего, рыдающя со тщанием приидоша, глаголющя: кто украде наше Упование? Кто взят мертва, нага смирною помазана, Матери едино утешение? о како мертвыя ожививый умертвися? ад пленивый, како погребеся? Но воскресни Спасе самовластно, якоже рекл еси, тридневен, спасаяй душы нашя.
И ныне, Богородицен, Глас 2:
Прейде сень законная, благодати пришедши: якоже бо купина не сгараше опаляема, тако Дева родила еси, и Дева пребыла еси. Вместо столпа огненнаго, праведное возсия Солнце: вместо Моисеа, Христос, спасение душ наших.
Вход. Свете тихий. Прокимен: Господь воцарися:
На литии стихиры самогласны, глас 1:
Мvроносицы жены, ко гробу что приидосте? Что ищете Живаго в мертвых? Воскресе Господь, дерзайте, вопиет Ангел.
Со страхом приидоша жены на гроб, ароматы тело Твое помазати тщашыяся: и сие не обретше, недоумевахуся друга ко друзей, не ведуще Воскресения. Но предста им Ангел и рече: воскресе Христос, даруяй нам велию милость.
Приидоша на гроб Магдалина, и другая Мария ищуще Господа, и Ангела видевша яко молнию седяща на камени, и глаголюща им: что ищете Живаго с мертвыми? Воскресе, якоже рече: в Галилеи Его обрящете. К Нему же возопиим: воскресый из мертвых, Господи, слава Тебе.
Слава, глас 6:
Проси Иосиф тело Иисусово, и положи е в новом своем гробе: подобаше бо Ему из гроба, яко от чертога проити. Скорушивый державу смерти, и отверзый врата райская человеком, Господи слава Тебе.
И ныне, Богородичен, глас тойже:
Творец и Избавитель мой, Пречистая, Христос Господь, из Твоих ложесн прошед, в мя оболкийся, первыя клятвы Адама свободи: темже Ти, Всечистая, яко Божии Матери же и Деве воистинну, вопием немолчно: радуйся, Ангельски, радуйся, Владычице, Предстательство и Покрове и Спасение душ наших.
На стиховне стихира воскресна, глас 2.
Воскресение Твое, Христе Спасе, всю просвети вселенную, и призвал еси Твое создание, Всесильне Господи, слава Тебе.
Таже стихиры Пасхи с припевы их.
Слава, глас 5:
Тебе одеющагося светом, яко ризою, снем Иосиф с древа с Никодимом и, видев мертва нага непогребена, благосердный плач восприим, рыдая, глаголаше: увы мне, Сладчайший Иисусе! Егоже вмале солнце на Кресте висима узревшее мраком облагашеся, и земля страхом колебашеся, и раздирашеся церковная завеса: но се ныне вижу Тя, мене ради волею подъемша смерть. Како погребу Тя, Боже мой, или какою плащаницею обвию? Коима ли рукама прикоснуся нетленному Твоему Телу? Или кия песни воспою Твоему исходу, Щедре? Величаю Страсти Твоя, песнословлю и погребение Твое со Воскресением, зовый: Господи, слава Тебе.
И ныне, Воскресения день: и Христос воскресе: единожды.
Таже Ныне отпущаеши: на благословении хлебов тропарь Богородице Дево: трижды. И обычное чтение Деяний.
Аще ли случится не быти бдению: поются на Господи воззвах стихиры воскресны, 4, и мvроносиц с литийными, на 6. Вход. Прокимен. На стиховне стихиры Пасхи. Слава:, и ныне, глас 5, Тебе одеющагося светом: На полунощнице канон Троичен поется по обычаю.
Ведомо же буди, яко от недели святаго Фомы, не бывает хлебопреломления по благословении хлебов, за краткость нощи.
В неделю 3-ю по Пасхе, святых мvроносиц.
На утрени.
На Бог Господь: тропарь, глас 2.
Егда снизшел еси к смерти, Животе безсмертный, тогда ад умертвил еси блистанием Божества: егда же и умершия от преисподних воскресил еси, вся силы небесныя взываху: Жизнодавче Христе Боже наш, слава Тебе. [Дважды]
Слава: Благообразный Иосиф с древа снем Пречистое Тело Твое, плащаницею чистою обвив и благоуханьми, во гробе нове покрыв положи, но тридневен воскресл еси, Господи, подаяй мiрови велию милость.
И ныне: Мvроносицам женам, при гробе представ, Ангел вопияше: мvра мертвым суть прилична, Христос же истления явися чуждь.
По 1-м стихословии седальны, глас 2:
Камень гробный запечатати не возбранив, камень веры воскресый подал еси всем: Господи, слава Тебе.
Стих: Воскресни, Господи Боже мой, да вохнесется рука Твоя:
Недро Пречистое в вышних не истощивый, погребение и воскресение о всех приял еси: Господи, слава Тебе.
Слава, и ныне, Богородичен:
Вся паче смысла, вся преславная Твоя, Богородице, таинства, чистоте запечатанней и девству храниму, Мати позналася еси неложна, Бога рождьши Истиннаго: Того моли спастися душам нашым.
По втором стихословии седальны, глас 2:
Мvроносицы утро пришедшия, и гроб тощ увидевшыя, апостолом глаголаху:тление низложи Державный, и сущыя во аде исхити уз: проповедите дерзновением, яко воскресе Христос Бог, даруяй мiрови велию милость.
Стих: Исповемся Тебе Господи, всем сердцем моим:
Мvры погребения Твоего жены носящя, тай ко гробу приидоша уранше, иудейския боящеся дерзости, и воинов предзряще утверждение. Но естество немощное мужество победи: яко яко намерение милостивое Богу угоди. Прилично убо взываху: воскресни Господи, помози нам и избави нас славы ради Имене Твоего.
Слава, и ныне, Богородичен:
Препрославлена еси, Богородице Дево, поем Тя: Крестом бо Сына Твоего низложися ад, и смерть умертвися, умерщвленнии востахом, и живота сподобихомся, рай восприяхом, древнее наслаждение. Тем благодаряще, славословим, яко Державнаго Христа Бога нашего, и Единаго Многомилостиваго.
И чтение во Евангелии толковом по чину своему.
По непорочнах тропари: Ангельский собор:
И абие ипакои: Глас 2:
По страсти шедше во гроб жены, во еже помазати Тело Твое, Христе Боже, видеша ангелы во гробе, и ужасошася: глас бо слышаху от них: яко воскресе Господь, даруяй мiрови велию милость.
И чтение. И абие степенны, глас 2, по дважды.
Антифон 1:
На Небо очи пущаю моего сердца, к Тебе, Спасе: спаси мя Твоим осиянием.
Помилуй нас, согрешающих Тебе много на всякий час, о Христе мой, и даждь ми образ прежде конца покаятися Тебе.
Слава: Святому Духу, еже царствовати подобает, освящати, подвизати тварь: Бог бо есть, Единосущен Отцу и Слову.
И ныне, тойже.
Антифон 2:
Аще не Господь бы был в нас, кто доволен цел сохранен быти от врага, купно и человекоубийцы?
Зубом их не предаждь Спасе, Твоего раба: ибо львовым образом на мя подвизаются врази мои.
Слава: Святому Духу живоначалие и честь: вся бо созданная, яко Бог Сый, силою соблюдает во Отце, Сыном же.
И ныне, тойже.
Антифон 3:
Надеющиеся на Господа, уподобишася горе святей: иже никакоже движутся прилоги вражиими.
В беззакония рук своих да не прострут Божественне живущии: не оставляет бо Христос жезла на жребии Своем.
Слава: Святым Духом точится всяка премудрость: отсюду благодать апостолом, и страдальчествы венчаются мученицы, и пророцы зрят.
И ныне, тойже.
Прокимен, глас 2: Воскресни Господи Боже мой повелением, имже заповедал еси, и сонм людей обыдет Тя.
Стих: Господи Боже мой, на Тя уповах, спаси мя.
Всякое дыхание:
Евангелие утреннее воскресное, 3, от Марка, зачало 81.
Воскрес Иисус заутра в первую субботу:
таже Воскресение Христово видевше, поклонимся: Трижды. Псалом 50 и прочее.
Канон Пасхи со ирмосом, и с Богородичны его, на 6. Таже настоящия недели, Триоди канон на 8, глас 2: Творение господина Андреа Критскаго. Катавасия: Воскресения день:
Канон Пасхи, глас 1.
Песнь 1.
Ирмос: Воскресения день:
Очистим чувствия: Небеса убо достойно:
Иный канон Богородичен, подобен. Егоже краестрочие на первых тропарех: Феофанус. Глас тойже.
Умерщвления предел сломила еси, вечную Жизнь рождшая, Христа, из Гроба возсиявшаго днесь, Дево Всенепорочная, и мiр просветившаго.
Воскресшаго видевши Сына Твоего и Бога, радуйся со апостолы, Богоблагодатная Чистая, и еже радуйся первее, яко всех радости вина, восприяла еси,/ Богомати Всенепорочная.
Иный канон мvроносиц, в немже поставим стихов 8.
Песнь 1. Глас 2.
Ирмос: Моисейскую песнь восприимши, возопий душе: Помощник и Покровитель бысть мне во спасение, Сей мой Бог, и прославлю Его.
Распялся еси плотию, Безстрастный естеством Отчим: прободен был еси в ребра, Источивый мiрови кровь и воду: Ты Бог наш, и прославляем Тя.
Крест Твой почитаю, и погребение славлю, Блаже, и пою и покланяюся востанию Твоему, и взываю: Ты Бог наш, и прославляем Тя.
Аще и вкусил еси желчи, сладосте церковная, но источил еси нам нетление, от ребр Твоих: Ты Бог наш, и прославляем Тя.
Вменился еси Спасе с мертвыми, мертвыя воздвигнувый, вкусил еси тли: истления бо всяко не познал еси: Ты Бог наш, и прославляем Тя.
Да веселится Сион, да радуется и небо, воскресе Христос, мертвыя воздвигнувый, песнословящыя: Ты Бог наш, и прославляем Тя.
Плащаницами обвив Иосиф Тело Твое Христе, во гробе нове положи Тя Спасение: Ты же мервыя яко Бог воскресил еси.
Предварившыя утро жены, видеша Христа, и божественным вопияху учеником: воистинну Христос воскресе, приидите с нами воспойте Его.
Слава: Всесвятая Троице, Едино Божество, Безначальная единице, Отче, Сыне и Божественный Душе, спасай мiр: Ты Бог наш, и прославляем Тя.
И ныне: Древнюю клятву разрешивши Чистая, во утробе Твоей возрастила еси нам Благословение: Младенца родивши: Сей Бог наш, аще и плоть носит.
Песнь 3.
Ирмос: Приидите пиво пием новое:
Ныне вся исполнишася Света: Вчера спогребoхся Тебе, Христе
Ин:
На нетленную Жизнь прихожду днесь благостию Рождшагося из Тебе, Чистая, и всем концем Свет облиставшаго.
Бога, Егоже родила еси плотию, из мертвых, якоже рече, воставша видевши, Чистая, ликуй и Сего яко Бога, Пречистая, возвеличай.
Ин:
Ирмос: Неплодствовавший мой ум, плодоносен Боже покажи ми, Делателю добрых, Насадителю благих, благоутробием Твоим.
Длани на Кресте простерл еси, Иисусе, языки вся от прелести собрав, к познанию Твоему созвал еси Спасе.
Иудейстии людие Пилату вопиют: отпусти нам злодейственнаго разбойника, возми, возми распни Безгрешнаго.
Распеншуся Тебе Христе, помрачися свет, земля потрясеся, и из гробов мертвии восташа мнози, страхом державы Твоея.
Предстоящи Кресту Агница Твоя, Иисусе, плачем вопияше: камо идеши Сыне? Камо грядеши Агнче, за всех заклавыйся?
Покланяюся Твоему Кресту, воспеваю и погребение, почитаю страсти и гвоздия руку, и копие, Иисусе, и Воскресение Твое.
Воскресл еси Иисусе, пленен бысть враг, Адам избавися, и Ева с ним от уз и тли, Воскресением Твоим.
Воскресшу Тебе Христе, сокрушишася вереи и врата адова, и смертныя узы разрушишася, абие страхом державы Твоея.
Богоприемче Иосифе гряди, стани с нами, воскресе зовый, Иисус Избавитель, воздвигнувый Адама благоутробием Своим.
Да радуется с нами учеников двоенадесятица, с мvроносицами женами и Иосифом, и со другими ученики и ученицами Христовыми.
Слава: Со Отцем и Сыну и Духу Правому, Единому Естеству покланяюся и воспеваю, лицы разделяя и существом соединяя.
И ныне, Богородичен: Блаженна еси Чистая, из корене Иессеова сущая, из негоже Жезл и Цвет Христа, по плоти нас ради возрастившая.
Кондак, глас 8.
Аще и во гроб снизшел еси: И икос.
И седален, глас 2.
Подобен: Вышних ищя:
Мvра тепле гробу приносят жены Спасе, Ангела светлостию душы веселяху, и Бога Тя всех проповедаху, и учеником вопияху: воистинну воскресе из гроба всех Жизнь.
Слава и ныне: глас тойже.
Учеников твоих лик с мvроносицами женами радуется согласно: общий бо праздник с ними празднуют, в славу и честь Твоего Воскресения. И теми вопием тя Человеколюбче Господи: людем Твоим подаждь велию милость.
Песнь 4.
Ирмос: На Божественней стражи:
Мужеский убо пол: Яко единолетный Агнец: Богоотец убо Давид:
Ин:
Создавый Адама, Твоего праотца, Чистая, зиждется от Тебе, и смертное жилище разори Своею смертию днесь, и озари вся Божественными блистаньми Воскресения.
Егоже родила еси, Христа, прекрасно из мертвых возсиявша, Чистая, зрящи, добрая и непорочная в женах и красная, днесь во спасение всех со апостолы радующися, Того прославляй.
Ин:
Ирмос: Еже от Девы твое Рождество пророк предзря, воспропроведаше вопия: слух Твой услышах, и убояхся, яко от юга и из горы святыя приосененныя пришел еси Христе.
Крестом пленил еси адово чрево, и совоздвигл еси мертвыя, и смерти разрушил еси мучительство: темже иже от Адама покланяюшиися, поем погребение Твое и востание Христе.
Благоволивый Спасе наш, за благоутробие милости пригвоздитися на кресте, и от праотчия избавити ны клятвы, разреши узы многих моих согрешений: можеши бо, елика хощеши, творити.
На кресте пригвоздивый мою древнюю клятву, и источивый мне Спасе, благословение Кровию от ребр Твоих, разреши узы многих моих согрешений: можеши бо, елика хощеши, творити.
Ад Спасе, срет Тя в преисподних, огорчися помышляя, яко яже древле пожрети возмогий, ныне неволею отдав, истязуется в дольних, и пленяемь и обнажаемь бывает мертвых.
Аще и камень запечатася с кустодиею, о беззаконии врази, но воскресе Господь, якоже прорече, разрешая узы многих моих согрешений: может быть, елика хощет, творити.
Воскресый из гроба, и пленивый ада, и ожививый мертвыя, и нетление источивый мне Твоим востанием, разреши узы многих моих согрешений: можеши бо, елика хощеши, творити.
Воистинну постыдитеся беззаконии, Христос бо воскресе, и совоздвиже мертвыя, зовый: дерзайте, Аз победих мiр. Веруйте убо Ему, или умолчите лестцы, отметающиеся Воскресения Его.
Мvроносицам, еже радуйтеся, воскресый от гроба, возгласив Блаже, и апостолом, проповедайте востание Мое, разреши узы многих моих согрешений: можеши бо, елика хощеши, творити.
Иосифа благообразнаго, ревнителя благочестия, советника и ученика, с мvроносицами почтим, и апостолами, зовуще с ними, и верно воспевающе Спасово Воскресение светло.
Слава: Пресущнаго Божества нераздельную славу, кто возможет изрещи? Едино бо естеством сущи, Троица поется Безначальная, срасленная яко Единица, в Троице певаемая Ипостасьми простыми.
И ныне: Во чрево Твое Всельшагося безмужно рождшая Мати Дево Чистая, непрестанно моли яко Богородица, разреши узы многих моих согрешений: можеши бо, елика хощеши, помощи.
Песнь 5.
Ирмос: Утренюем утреннюю глубоку:
Безмерное Твое благоутробие: Приступим, свещеноснии:
Ин:
Просвещается Божественными лучами и живоносными Воскресения Сына Твоего, Богомати Пречистая, и радости исполняется благочестивых собрание.
Не разверзл еси врата девства в воплощении, Гроба не разрушил еси печатей, Царю создания, отонудуже, воскресшаго Тя зрящи, Мати радовашеся.
Ин:
Ирмос: Мглу души моея Спасе мой разгнав, светом заповедей Твоих озари мя, яко Един Царь мира.
Ты первую одежду мою, юже ми истка, увы мне, сеятель греха, совлекл еси Спасе мой, облекся в мя.
Листвие смоковное сши мне грех мой, увы мне, не сохраншему, Спасе мой, пречистую заповедь Твою, змииным советом.
Уязвившуюся душу мою разбойническими помышленьми моими, представый Иже от Марии, и елей возлияв, исцели Христос.
У Креста предстоящи Пречистая Богородица, Матерски взываше: оставил мя еси едину, о Сыне Мой и Боже!
Ты злоначальнаго змия оружием Креста Твоего низложив, Твоим востанием, сокрушил еси жало смерти, Иисусе.
Где твое, смерте, жало? Где твоя, аде, победа; Адам да свопиет: сокрушился еси оживлением воздвигшаго мертвыя.
Мvроносицы жены гроба Твоего достигшыя, оживившаго дольных, глас слышаху глаголющий: воскресе Христос.
Благочестивых мvроносиц память совершающе, и всех ученик Твоих, в светлом Твоем востании, воспеваем Тя Христе.
Благообразнаго вси почтим достойно, иже тело Господне от древа сня, и погребе верно.
Слава: Тебе Богу и Отцу, и Сыну, и Духу покланяюся, трем Ипостасем, и Едино Три верую, Существом Единем.
И ныне: Тя безсеменным Рождеством Родившую паче естества Обновившаго естество, Христа Единаго Владыку воспеваем вернии.
Песнь 6.
Ирмос: Снизшел еси в преисподняя земли:
Сохранив цела знамения, Христе: Спасе мой, живое же и нежертвенное заколение:
Ин:
Возведеся древле держимое смертию и тлением Воплотившимся от Твоего Пречистаго чрева к нетленней и присносущней Жизни, Богородице Дево.
Сниде в преисподняя земли, в ложесна Твоя, Чистая, Сшедый, и Вселивыйся, и Воплотивыйся паче ума, и воздвиже с Собою Адама, воскрес от Гробa.
Ин:
Ирмос: Во глубине греховней содержимь есмь Спасе, и в пучине житейстей обуреваемь: но якоже Иону от зверя, и мене ныне от страстей возведи и спаси мя.
Мертв есть ад, дерзайте земнороднии, Христос бо на древе висяй, верже оружие нань, и лежит мертв: яже бо имяше, пленися обнажився.
Пленися ад, дерзайте мертвии, и гроби отверзошася, востаните от ада, вопиет вам Христос, вся пришедый избавити от смерти и тли.
Мертвыя якоже возмог пожерл еси иногда, ныне истязуемь аде, отдаждь ми, вопиет тебе Жизнодавец и Бог, вся пришедый избавити от ненасытаго твоего чрева.
Жены мvроносицы, что тщитеся прочее? Что же Живому мvра приносите? Воскресе Христос, якоже предрече, да престанут вашя слезы, прешедшыя на радость.
Плащаницею Тя Христе обвив Иосиф благообразный, во гробе положи: мvропомазав же разоренный Твоего телесе храм, привали камень великий ко гробу.
Господь воскресе плениваый врага, и узники исторгнув, возведе вся, и первозданаго Адама, того возставляя, яко Благоутробен и Человеколюбец Бог.
Слава: Троицу во единстве воспоим вернии, с Сыном Отца славяще, и Духа Единосущна Сыну, и суща во Отце Собезначальнаго и Присносущнаго Бога.
И ныне: Во чреве невозделанно зачала еси Чистая, нетления грозд, яко лоза: из Неяже безсмертия токи, якоже вино, нам источают вечную жизнь.
Кондак, глас 2:
Радоватися мvроносицам повелел еси, плач праматере Евы утолил еси Воскресением Твоим, Христе Боже, апостолом же Твоим проповедати повелел еси: Спас воскресе от гроба.
Икос: На гроб Твой Спасе мvроносицы идущыя, к себе недоумевахуся умом и вещаху: кто нам камень отвалит гробный? И воззревшя видят, яко камень отвален бе, зраку же ангелову со одеянием дивляхуся: содержими же бяху трепетом и бежати помышляху. И к ним юноша возопи: не бойтеся вы, Егоже ищете воста, приидите, видите место, идеже лежаше тело Иисусово, и скоро шедшыя возвестите учеником: Спас воскресе от гроба.
Песнь 7.
Ирмос: Отроки от пещи избавивый:
Жены с мvры Богомудрыя: Смерти празднуем умерщвление: Яко воистинну священная:
Ин.
Умертвив Сын Твой смерть, Всенепорочная, днесь, всем смертным пребывающий живот во веки веков дарова,/ Един Благословенный отцев Бог и Препрославленный.
Всем царствуяй созданием, быв Человек, вселися во Твою, Богоблагодатная, утробу, и, распятие претерпев и смерть, воскресе Боголепно, совозставив нас, яко Всесилен.
Ин.
Ирмос: Херувимы подражающе отроцы в пещи ликовствоваху, вопиюще: благослвен еси Боже, яко истиною и судом навел еси сия вся, грех ради наших: препетый и препрославленный во веки.
Ты яко Человеколюбец, хотяй вся спасти от прелести, яже создал еси, претерпел еси пригвоздитися на кресте: да погребенный образ страстьми, сей плотию Твоею обновиши Спасе, и ад низложив, воскресил еси и умершыя с Собою.
На кресте возвышаемь, вся призвал еси к Себе Щедре, якоже обещал еси Блаже: яко воистинну вся сия грехов ради наших пострадати благоволил еси. Темже и разбойнику райская врата отверзл еси Спасе.
Ты храм телесный воздвигл еси разоренный, тридневно из гроба, якоже обещал еси Блаже: да воистинну скажеши славу Твою, юже нам источаеши верою, узы разрешив, ихже держаше древле ад связанных.
О иудейское безумие! О неистовство беззаконных! Что неверное видевше, не веровасте Христу? Яко немощныя, не словом ли возвиже? Или яко весь мiр той не спасе ли? Да уверяют вамс поне воини, или воскресшие из мертвых.
Омертвевшии стражие ныне да глаголют, како украден быть, Егоже не видеша неразумнии всегда? аще бо воскресша не видеша, ни ощутиша, како украдена Сего разумети можаху когда? да уверит вы поне камень сей, и погребальная Христова.
Что яко мертва блюдете? Что печати на камене положисте еврее, страхом боящеся крадения? Се воистинну гроб запечатлеся: како убо воскресе, аще не бы Бог был Христос; да уверяют вы воскресшии, и видими бывшии многими.
Слава: Со Отцем славим Сына, и Духа Святаго, вопиюще непрестанным гласом: Троице Единственное Существо, помилуй, спаси вся, в триех Лицех Единице ущедри ны, Препрославленный Боже во веки.
И ныне: Во чреве Твоем Пречистая, како вместила еси Младенца, Егоже трепещут силы ангельския яко Бога? разве якоже восхоте, якоже весть вселися, вся спасти хотяй от Адама земнородныя, разрешивый Адама клятвы оныя, снедию горькою.
Песнь 8.
Ирмос: Сей нареченный и Святый День:
Приидите, новаго винограда рождения: Возведи окрест очи твои, Сионе, и виждь: Отче Вседержителю, и Слове, и Душе:
Ин.
Прииде Тобою в мiр Господь, Дево Богородице, и чрево адово расторг, смертным нам Воскресение дарова. Темже благословим Его во веки.
Всю низложив смерти державу, Сын Твой, Дево, Своим Воскресением, яко Бог Крепкий, совознесе нас и обожи. Темже воспеваем Его во веки.
Ин.
Ирмос: В купине Моисею Девы чудо, на Синайстей горе, Прообразившаго иногда пойте, благословите и превозносите во вся веки.
Солнечныя зари спратахуся страхом Христовых страданий, и востаху мертвии, и горы прекланяхуся, и колебашеся земля, и ад обнажися.
В пещи сущии иногда треблаженнии отроцы возвышающе руки, проображаху Блаже Пречестный Крест Твой, имже низложил еси Христе вражию силу.
О иудее слепии прелестницы и преступницы, Христову воскресению неверующии, яко ложному: что неверное видите, яко воскресе Христос, мертвыя возвигий?
О иудее врази, аще и нам не веруете, вашя воины вы вопросите, что пострадаша они? Кто отваливый руками камень от гроба?
Кто изсушивый смоковницу; кто же сухую исцеливый руку? Кто насытивый иногда множества в пустыни, аще не Христос Бог, мертвыя воздвигнувый?
Кто просветивый слепцы, и прокаженныя очистивый, и хромыя исправивый, и пешешествовавый море немокренно яко сушу, аще не Христос Бог, мертвыя воздвигнувый?
Кто воздвигнувый мертва четвородневна из гроба, и вдовича сына? кто стягнувый яко Бог разслаблена на одре, аще не Христос Бог, мертвыя воздвигнувый?
Зовет камень самый, печати вопиют, яже вы положивше, постависте стражу хранящую гроб: воистинну воскресе Христос, и живет во веки.
Воистинну воскресе Христос, пленен бысть ад, умертвися змий, избавися Адам, потрясошася дольнии: что не веруете прочее, врази и преступницы?
Благословим Отца, и Сына, и Святаго Духа Господа.
Со Отцем Сына и Духа Святаго Святую Троицу в Божестве Едином прославляем, вопиюще: Свят, Свят, Свят еси во веки.
И ныне, Богородичен: Во чреве Твоем, Чистая, присноживотный Хлеб, смешенный несмесно, смешением нашим, родила еси непреложно Единаго Христа Бога во двою Существу.
Хвалим, благословим, покланяемся Господеви:
Катавасия: Сей нареченный и Святый День:
Честнейшую не поем до отдания Пасхи во вся недели.
Песнь 9.
Ирмос: Светися, светися:
О, Божественнаго, о, любезнаго: О, Пасха велия и священнейшая, Христе!
Ин.
Согласно, Дево, Тебе блажим, вернии: радуйся, двере Господня,/ радуйся, граде одушевленный, радуйся, Еяже ради нам ныне возсия Свет из Тебе Рожденнаго из мертвых Воскресения.
Веселися и радуйся, Божественная Двере Света: зашедый бо Иисус во Гроб возсия, просияв солнца светлее, и верныя вся озарив, Богорадованная Владычице.
Ин.
Ирмос: Преестественно плотию Заченшую во чреве, от Отца безлетно Предвозсиявшее Слово, в песнех немолчных величаем вернии.
Иже на Кресте разбойника познавша Тя Бога, наследника содеял еси мысленному раю, еже помяни мя вопиюща, Всесильне Спасе.
Заушен нас ради, и оплеван был еси Иисусе от беззаконников, скрижали закона начертавый в Синаи, угоднику Моисею.
Оцта и желчи Спасе, напоен был еси нас ради, давый нам Тело и Честную Кровь, в снедь же и питие вечныя Твоея жизни.
В животныя ребра копием прободен быв Христе, Пречистую Твою Кровь, и Честную воду источил еси мiрови, яко присноживотный Источник.
Вменился еси в мертвых, оживлей мертвыя: во гробе положен еси, истощивый гробы: пленил еси ад, воскресив Адама.
Воскресл еси Иисусе, связан бысть враг, пленися ад, испразднишася гроби, восташа дольнии, покланяющеся Тебе, Христе.
Кто украдый мертваго, паче же и нага? Что льститеся еврее? Христос воскресе, и разрушаются адовы узы и вереи.
Слава Тебе, Христе Спасе, источивый жизнь, и свет возсиявый сущым во тме неведения, и всю землю просветивый востанием Твоим.
Благообразный советник Иосиф, да поется с мvроносицами, и божественными учениками, яко проповедник сый и сей, востания Христова.
Иосифа чуднаго да восхвалим вернии, купно с Никодимом, и мvроносицами верными, вопиющыя: Господь воскресе воистинну.
Слава: Безначален еси Отче, несозданен еси Сыне, сопрестолен и Душе Святый, Едино [сия Три] Естеством, и Три Лицы, Едине Боже Истинный.
И ныне: Да веселится Иессей, да ликовствует и Давид: се бо Дева богорасленный Жезл прозябе, Цвет Присноживотный Христа.
Вместо Достойно: ирмос, катавасия: Светися, светися:
Таже: Свят Господь Бог наш: на глас 2.
Екзапостилларий Пасце: Плотию уснув: единожды.
Слава, мvроносицам:
Жены услышите глас радования: мучителя ада поправый, от тли мiр воздвиже, тецыте, другом рцыте Моим благовестия: хощу бо создание Свое радостию озарити, отонудуже прииде печаль.
И ныне, тойже.
На хвалитех, Всякое дыхание: поставим стихов 8, и поем
стихиры воскресны 4, глас 2:
Стих: Сотворити в них суд написан, слава сия будет всем преподбным Его.
Всякое дыхание, и вся тварь Тя славит Господи, яко крестом смерть упразднил еси: да покажеши людем еже из мертвых Твое Воскресение, яко Един Человеколюбец.
Стих: Хвалите Бога во святых Его:
Да рекут иудее, како воини погубиша стрегущии Царя? почто бо камень не сохрани Каменя Жизни? или Погребеннаго да дадят, или Воскресшему да поклонятся, глаголюще с нами: слава множеству щедрот Твоих, Спасе наш, слава Тебе.
Стих: Хвалите Его на силах Его:
Радуйтеся людие и веселитеся, ангел седяй на камени гробнем, той нам благовести рек: Христос воскресе из мертвых, Спас мiра, и исполни всяческая благоухания. Радуйтеся людие и веселитеся.
Стих: Хвалите Его во гласе трубнем:
Ангел убо, еже радуйся, прежде Твоего зачатия, Господи, Благодатней принесе: Ангел же камень славнаго Твоего гроба в Твоем воскресении отвали. Ов убо в печали место веселия образы возвещая: сей же вместо смерти Владыку Жизнодавца проповедуя нам. Темже вопием Ти: Благодетелю всех Господи, слава Тебе.
Стих: Хвалите Его в тимпане и лице:
И восточны 4:
Возлияша мvра со слезами на гроб Твой жены, и исполнишася радости уста их, внегда глаголати: воскресе Господь.
Стих: Хвалите Его в кимвалех доброгласных:
Да похвалят языцы и людие Христа Бога нашего, волею нас ради крест претерпевшаго, и во аде тридневновавшаго, и да поклонятся Его из мертвых Воскресению, имже просветишася всего мiра концы.
Стих: Воскресни Господи Боже мой, да вознесется рука Твоя:
Распят и погребен был еси Христе, якоже изволил еси, испровергл еси смерть, и воскресл еси во славе, яко Бог и Владыка, даруя мiрови жизнь вечную и велию милость.
Стих: Исповемся Тебе Господи всем сердцем моим:
[сия же запевы по вся воскресения]
О воистинну беззаконии печатавшии камень, болших нас чудес сподобисте! Имут разум стражие, днесь пройде из гроба и глаголаху: рцыте, яко нам спящым, приидоша ученицы, и украдоша Его. И кто крадет мертвеца, паче же и нага? Сам воскресе самовластно, яко Бог, оставль во гробе и погребательная Своя. Приидите видите иудее, како не расторже печати смерть Поправый, и роду человеческому безконечную жизнь даруяй, и велию милость.
Слава, глас 2. Стиира Евангельская.
С мvры пришедшым яже с Мариею женам, и недоумевающымся, како будет им улучити желание, явися камень взятый, и Божественный юноша утоляяй мятеж душ их: воста бо, глаголет, Иисус Господь. Темже проповедите проповедником Его учеником, в Галилею тещи, и видети Его воскресша из мертвых, яко Жизнодавца и Господа.
И ныне: Преблагословенна еси Богородице Дево:
Славословие великое. Тропарь воскресен. Ектении и отпуст. И обычное исхождение в притвор. И поучение Студитово. И час первый. И совершенный отпуст.
На часех тропарь воскресен. Слава: Благообразный Иосиф: И ныне: Богородичен часов. По Трисвятом кондак: Радоватися мvроносицам: такожде бывает и на прочих часех.
На Литургии
блаженна гласа, на 4, глас 2:
Помяни Благоутробне и нас, якоже помянул еси разбойника во Царствии Небеснем.
Древо изгна Адама, Крест введе разбойника в Царство Небесное.
Гроб подъят Тя Спасе, Гробы Истощившаго, и мертвым живот Даровавшаго, яко Бога.
Апостоли славнии Христовы, Того молите прилежно, да от бед спасет ны.
И от канона дне, песнь 6, на 4.
На входе тропарь: Егда снизшел еси к смерти: и Благообразный Иосиф: Слава, кондак Триоди: И ныне, Пасхи: Аще и во гроб:
Прокимен, глас 6: Спаси Господи люди Твоя и благослови достояние Твое.
Стих: К Тебе Господи воззову, Боже мой, да не премолчиши от мене.
Апостол деяний, зачало 16: Умножывшимся учеником:
Аллилуиа, глас 8: Благоволил еси Господи землю Твою, возвратил еси плен Иаковль.
Стих: Милость и истина сретостеся, правда и мир облобызастася.
Евангелие от Марка, зачало 69: Прииде Иосиф:
Причастный: Тело Христово приимите: Другий: Хвалите Господа с небес:
[зри]
Аще храм святых жен мvроносиц, на малей и велицей вечерни, и на утрени, и на литургии, поем во всем подобне, якоже великомученику Георгию. Точию на вечерни паремии чтем, писаны в неделю всех святых.
На утрени по полиелеи величание поем сице:
Величаем вас святыя мvроносицы, и чтем святую память вашу: вы бо молите о нас Христа Бога нашего.
Псалом: Блажен муж, бояйся Господа и прочая.